Kyrrðarstund

Byrjið á því að koma ykkur vel fyrir og leyfið barninu að finna þá stöðu sem því líður best í, sitjandi eða liggjandi, með augun opin eða lokuð. Þegar ró hefur færst yfir, veljið spjald og gefið ykkur smá stund saman áður en æfingin hefst. Skoðið myndina á framhliðinni og lesið síðan æfinguna á bakhliðinni í rólegheitum.

Í æfingunum er andað inn um nefið. Það hjálpar til við að halda önduninni rólegri og mýkri. Útöndunin má fara í gegnum munninn eða nefið, eftir því hvað hentar barninu best.

Fylgstu með líkama barnsins á meðan það andar. Við rólega öndun hreyfist maginn gjarnan mjúklega út og inn á meðan axlirnar fá að vera slakar. Ef barninu líkar snerting getur hlý hönd á öxl eða baki hjálpað því að slaka á.

Endurtakið hverja æfingu nokkrum sinnum og leyfið önduninni að finna sinn eigin takt. Æfingarnar eiga alltaf að vera þægilegar. Ef barnið finnur fyrir svima eða óþægindum er best að gera hlé og anda eðlilega þar til því líður vel aftur.

Gerið æfingarnar þegar ró ríkir. Þannig verða þær barninu kunnuglegar og auðveldara verður fyrir það að grípa til þeirra þegar tilfinningarnar verða sterkar eða það þarf á smá ró að halda.

Leyfið leiknum og ímyndunaraflinu að leiða ykkur áfram.

Það er engin ein rétt leið til að gera æfingarnar. Mikilvægast er að stundin sé róleg, hlý og ánægjuleg.

Öndunin gerist sjálfkrafa, en við getum líka haft áhrif á hana. Þegar við verðum hrædd, kvíðin eða stressuð verður hún oft hraðari og grynnri. Með því að hægja á önduninni getum við hjálpað líkamanum að róast, hjartslættinum að hægja á sér og spennu að minnka.

Róleg öndun hefur áhrif á ósjálfráða taugakerfið, sem stjórnar meðal annars hjartslætti og viðbrögðum líkamans við álagi. Með því að hægja á önduninni fær líkaminn tækifæri til að færa sig úr spennu yfir í meiri ró og jafnvægi. Jafnvel nokkrar mínútur af rólegri öndun geta hjálpað líkamanum að slaka á og finna meiri kyrrð, ró og öryggi.

Börn eru enn að læra að finna jafnvægi þegar tilfinningar verða sterkar. Þar skiptir nærvera fullorðinna miklu máli. Þegar þú hægir á þér og andar rólega með barninu finnur það taktinn í önduninni, röddinni og nærverunni þinni.

Róin þín getur hjálpað barninu að finna sína eigin.

Öndun verður auðveldari að skilja þegar hún fær að vera leikur. Að lykta af blómi eða suða eins og humla leiðir öndunina áfram án langra útskýringa. Þannig lærir barnið í gegnum leik, ímyndunarafl og eigin upplifun.

Æfingarnar beina athyglinni að því sem gerist hér og nú: maganum sem rís og sígur, loftinu sem fer inn og út eða suðinu á vörunum. Þannig æfir barnið nærveru og líkamsvitund.

Með endurtekningu verður öndunin smám saman að kunnuglegu verkfæri sem barnið getur gripið til þegar það þarf á ró, einbeitingu eða smá hléi að halda.